Jude

1Omi Yahuda Yesu Kristi bara n Yakubu madoyi. Kwoi lo a Yesu-viyi n na aba vinya a za ye-yeyi n Shekwoyi wa kni. 2Fa Shekwoyi alheri, bugbafu n sun-sungyei, ɓa mwa nfye aba lo abye abye.

Agnigni Ntu Gaiciya Ɓo

3Omi anugundo ye-yeyi mi zhin shiri maka ga fye ntu n gni-gni ɓo n Shekwoyi la gayi, Ama nsaiye kwo la ze dole ma ka fye n nyaho tukwo gbo, ma gna ge fye sunkun n wyei bmi ntu n gaiciya ɓo n Shekwoyi ɓei ga owo aza, bwa sun gmanyi, ɓa shikwo ntna doshanyi, aye yi mwa begye. 4Mi da deye ntu ge amalami ho a tna Shekwoyi yekpeyi, ɓaku lofi n fye mi, ɓai ci ge n ya ku vi Yesu, na avun, yi ɓami ya zan-zan shi yi n cei pma n tna Shekwoyi ta ta dnawo. Aɓei ka oɓa knizun tun-yin sapa, ntu ge ɓala pmi da eyi Tukwoda, wato Dagayi Yesu Kristi.

5Omi amsa n ɓa aba okwonu nyi ge, Fye pa gaiciya ye ɓo nfye shin kpeye lo nyi nge, Shekwoyi ɓola wo aza gni n Masar kni, n na avun wa wu, aza vinya n ɓato ɓei gawo gaiciya ɓa zhin owo ɓe yen. 6Ma pa fye njesun, amalaikayi ɓo, n ɓa ɓei gyi-gyi-yi n tna cegye nyi, ama ɓa pmi da ɓenukwoyi zhin. Nsaiye Shekwoyi nɓai fi agma filo n kurkuku wyegmanya ɓai pmi wada nyipyei. 7Fyeto ze Sodom kni n Gomara yi amwi m, n na azhiyi nɓa ɓei shegun ɓa nyin, vinya n nu-nuyi n shakpe doho-dohoyi. Azanugbayi ɓai wo aje shakpe, Azhihi aɓei ku ɓa kpe ena, ɓaku ze misali n yi aba nge anapi lo aba n na ta, aɓenukwoyi zhinyi.

8Ama amalami a katayi ye ɓai gyiabye n na zan-zan nukwoyi, ɓai zhin laifi, ɓa gba ɓahin nayi, ɓai kpe aza agye n ba gyi abe tu n ɓa tukwo nyi, har ɓai kpe a malaika a gye. 9Ama mikailu, amalaika esu, esa n wo ɓei gni Musa nayin n Shetan yi, wo to ɓei zhin atna wa gnawo ɓeda kasan, ko wa kpewo agyen, ama wa ciwo ge, “Dagayi wo gnakniho.” 10Ama aza deye, ɓa kpe anya agye, ɓai kni anya akmi n ɓa to nɓa awyegayin, ngye anya fanya ɓai zhin aɓo n ɓa gye dama, ɓai lo n ɓa awye-wyeyi n na abwi.

11Aiya n ɓa aba, gama ɓaku vi Kayinu fye, n wo ɓei wu owo mado nyi, ngye Balamu ɓei zhin ɓehoɓehoi ntu agyiwye ɓo, n gye Kuraha ɓo la Shekwoyi beda zungna, ɓa fifi n owo knitu.

12Esanu n na aza deye ye ɓedo n nfyei n na abuki aba n na aduwa nyakun yi, ɓa zhin aza nukwoyi fi n fyemi, ɓai masan ɓai gyi abye, ɓai kna ɓahin, to ɓai pa azaje ɓon, ɓawu ngye alkawali to ɓai nun, ɓawu ngye ashinwa a gyi-gyi-yi n ɓa ta gyi nɓa sayin. Ɓato fifi yi nu gmayin ama ɓa fifi yi abwa aba: Ntu ge ala ɓa shiya n na agbegyei vinya a kpe ɓa eria.

13Enya nɓa fa n ɓa avun, okwo nu zhin vinyikwo, ngye alazhenya n nuwan kma kwa yaɓa zhi n edna gbe nyi. Ɓai zan laɓa ngye akpasu, buzangna nya, ama nɓa abye wyegmaa nyalo-nyalo nya n bugba wunyi n Shekwoyi nla zhin shiri gaɓa.

14Inok n wo ɓei zhin oza tnabayi n Adamu avun, ɓei kpe aza deye ɓo wa ci ge, “Gye, Dagayi ɓelo n wo azagyi-gyiyin mwa begye. 15Wo ɓei ɓe n na azanyikwoci yi n owada abye, ɓo gwo tata cewo ai wu aɓo anukwoyi n ɓa ku zhin gaba n Shekwoyi, woi wu oɓo n ɓa zhin nwo tukwo.” 16Aza deye zhin anya abwa shiyi nu nyaho ta kunɓa, bai zhin ɓenukwoyi doho-dohoi n ɓa gye, ɓai mwa ɓahin n gbeyi, n ɓa ga aza mwa-mwa ɓa ga ntuge ɓa ye nyaho nu.

Mi Nyakun Tu N Nyakungoro Manayi.

17Emi a nugundo, fye pa aɓo n eyi Dagayi Yesu Kristi abara ɓei gna fye. 18Nge n na anyipyei kmazoyi agyekpe yi ɓei ɓe, oɓa nufi vinya ɓa dabahin agma dna n zokwo nukwoyi doho-dohoi. 19Ɓai ɓe na jegnayi ɓai ye anya nukwoyi anyinya, ɓato n Zafun Gyi-gyi-yi dna n ɓa emin.

20Ama efye, emi a nugundo, fye mi fyehin fi n tushi eyi gaiciya ga gyi-gyi nya, fyei tumwi fyei zhin aduwa dna n Zafun Gyi-gyi-yi iko, n kalayi.

21Fye ku fi aba n Shekwoyi ye-ye nyi, Wa tu fye anabarka, fye pmi n hakuri yi, wye-wyeyi nyalo-nyalo nya n eyi Dagayi Yesu Kristi dna n wo sun-sun gye ye wo ga fye nyi. 22Fye bma aza zhin nɓa naɓo n fye mi nyi, fye gye aza sun-sun nɓa zhin shaka nyi. 23Gni aza ho ngye ho kun ɓa, n anapi, Azaho kuwa, bma ɓa zhin ɓa bwa Dagayi, ama fya zhin peceiye n na abai n fye ta bwi fi n ɓa laifin, fye na ɓa alaifi ɓo, ama fya gye ɓa sun-sun n ɓahin tukwo nɓa zhin alaifida nyi. 24– 25Nsaiye, mwa-mwa vinya n wo aba n wo zhin Shekwoyi gmanyi nyi, n wa gni yi ntu Yesu Kristi ɓonyi, e, mwa-mwa n kalayi vinya, iko vinya n ebe yi owo nya nu tunyi n kmisunyi, ɓa zhin owo nya nu tunyi n kmisunyi, ɓa zhin owo nya nu ɓai ɓo zhin owo nya nyalo-nyalo. Wo n ikoyi lo wa shifye bwa to fya taya fya miya, waɓe n fye yi ntna laifi n gyi-gyi-yi, n wo abye, mwa-mwa n kasun ci agmada nya yi, nyalo-nyalo. Amin.